ارسل الخبر لصديق
|
|
|
|
|
PalPress
تسجيل دخول / تسجيل
كُلنا برشلونة أو ريال
22/04/2011 [ 21:00 ]
تاريخ اضافة الخبر:
بقلم: بقلم : رامي مهداوي

يا عواجيز البلد الكرام، أنا مش راح أحكي عن المجلس الأعلى 'للشياب' أو مثل ما حكوا عنه المجلس الأعلى 'عمراً' للشباب، لالالالا خلص بكفي ازهقنا واتعبنا وحكوا ناس كثيرة عن الموضوع، وأنا كمان طلعت مرسوم باسم خرم إبره شكلت مجلس أعلى.
بس فيه ظاهرة مهمة عمالها تزداد، بدي أربطها مع المجلس الأعلى للشباب؛ تخيلوا انه في نفس الفترة اللي طلع فيها مرسوم السيد الرئيس بتشكيل المجلس، كان هناك مبارة نهائي كأس الملك الإسباني بين الفريق الكاتالوني برشلونة وفريق ريال مدريد، يعني مثل نهائي مركز طولكرم وثقافي طولكرم مثلا أو مثل الوحدات والفيصلي...... المهم شو بدكم من الطويلة. فاز الريال.... طبعاً إحنا الشباب والأطفال حتى العيلة الفلسطينية كانت بموعد بهذا اللقاء بطريقة تشوق ومتابعة ولا أروع..... لأسباب كثيرة وهون مربط الفرس.
قبل المباراة وبعدها حالة من الترقب والمتابعة....رفع الأعلام... الطريق من رام الله لعند بيت لحم صراع في الأعلام مره علم برشه مره ريال ...واللي بهالسيارات بشوحوا وبلوحوا الأعلام... والمقاهي عامله عمايل...وبعد المبارة على دوار الأسود في رام الله مظاهرات ومسيرات تجوب المدينة، وإطلاق الألعاب النارية .... والموظفين اتأخروا على شغلهم......؟ سامحنا يا مدير والله كنت سهران، سامحني يا أستاذ اتأخرت في النومه كنا في مسيره لعند الصبح احتفال....بهنيك وبهني أهلك فيك.
طيب طولوا بالكم،،، عارف انا عارف بدكم تسألوني شو دخل الليغا الإسبانية في المجلس الأعلى هون؟ سؤال مهم؟؟ عنجد سؤال مهم وهون بدي احكيلكم مربط الفرس اللي ذكرته قبل.
شبابنا حاسين في حالة فراااااااااااااااااااااااغ، حاسين في حالة غربه، حاسين حالهم في دوامه تعبوا من حالة الضياع، ما حدا يزاود علي ويحكيلي هذا الحكي مش صحيح، خلينا واقعيين واللي مش شايف يشوف واللي مش حاسس يحس....
صار الدوري الإسباني جزء من حياة الشب الفلسطيني، في انتماء، ثقافة، متابعة، علاقة تشاركية، هدف، تجمع وحوار، إعلام مسموع مرئي مكتوب.
وإذا سمحتولي بدي اقتبس مقتطفات عن هالموضوع جمعتهم من الفيس بوك حول الموضوع:
انا استغرب ان الشباب حافظين اسماء اللاعبيين والمدربين اكثر من اسماء حارات بقريتهم ما بالكم بفلسطين. وهناك من يتعرض لضغط نفسي وممكن ان يتعرض لوعكة صحية بينما لو مات 20 عادي! الكرة حلوة بس نفهما وصدق المثل الي بحكي العرس في عموريا ام بريج بترزع.
الموضوع مو موضوع كره بقدر ما هو هروب من الواقع السياسي ... محاوله لتبني ثقافة جديده بعيده عن المشاركة السياسية والعمل السياسي.
اللي انا شفته قبل وبعد المباراة ما شفته في يوم الأرض... ولا حتى يوم 15 آذار.... الشباب بفيضوا بالحيوية والعطاء والأهم بحبهم لبلدهم، وهذا الحب إذا ما قدرته وظليتك تتعامل بالموضوع بإستغلالية راح ينقلب السحر على الساحر' ويا حبيبي ما أكثر السحره' في كل مكان متخبي واحد.
والأهم في الموضوع بتسأل الشباب لشو هالحماس الزايد في التشجيع؟ بحكيلك الواحد فيهم أنا لاقي حالي هون أنا بفكر في مساحة للتخطيط مثلاً صرت أعرف ثقافة البرشه، وأعرف كيف مدرب مدريد' مورينويو' بتكتك، يعني يا حبيبي أنا مالي ومال السياسة بتعاتكم!!!
والله العظيم حكيك صح؟! مهوي إنت يا أبو الشباب ممكن اتموت وتشبع موت وما تلاقي مكان اتفرغ فيه طاقاتك وإبداعاتك، يعني لما يجيك الدور بكون عمرك زي عمر........ أكمل الفراغ كما تريد عزيزي القارئ.
الدروس المستفادة، بدك إشراك ومشاركة الشباب عشان ينزلوا يهتفوا باسمك بحزبك بقرارك، اذا انحطينا على الرف راح يكون هدفك 'آوت'، اذا ضيعتونا راح الوطن ينحسب 'تسلل'، اذا حطيتونا على 'دكة الاحتياط' وما لعبتونا!!! راح انغرد خارج السرب وما تستبعدوا نشكل فريق تاني النا، ونحدد فئته العمرية، وسن التقاعد..ومين يضل يلعب ومين يصير مدرب ومين يتقاعد! مع العلم انه بعز علينا، بس أنتم ما تركتولنا خيار، إنتم بدكم كلشي الكم، الكراسي بتزداد الكم.....خلص مشان الله خلص... إ ق ر ف ن اااااااااااااا.
للعلم أنا برشلوني، ولما أشجع برشلونا صرت أشجعها أكثر من أي شي تاني، أنا مع تاريخ برشلونا بس مش مع حاضرها اذا بخطئ، أنا مع رئيس النادي ومع المدرب 'غوارديولا' وأحلى بيكي الله يخليلك شكيرا ويتمم الموضوع على خير، بويول الله يقومك بالسلامه لساتك شباب ما ختيرت.... زي اللي في بالي وبعدهم ماسكين في الكراسي الشبابية.

تعليقات الفيسبوك
تعليقات الموقع