ارسل الخبر لصديق
|
|
|
|
|
PalPress
تسجيل دخول / تسجيل
الشغلة بدها فهم مش 'بصم'!
25/03/2011 [ 22:00 ]
تاريخ اضافة الخبر:
بقلم: بقلم : رامي مهداوي

لوين داخل تقرأ الموضوع هيك بسرعة، طول بالك شوي... اعمل فنجان قوة' بدون سكر' زي ما أنا بشربها وخلينا نركز في الموضوع، آه نركز بهدوء ونسمع من بعضنا، لأنه الموضوع ما حدا بحكي عنه الا الشعب، والشعب مسخم، مسخمممم بالميم مش بالنون! ركز معي الله يخليك ولا تفهمني غلط... شعب مسخم.
وين ما بروح الشغل، البيت، المقهى، في حفلة عيد ميلاد(اه عادي بحضر حفلات عيد ميلاد، ولناس كبار مش لأطفال...احنا كتير كوووول)، المهم بنرجع لموضوعنا...وين ما بروح..... بسمع الشعب بحكي طب إحنا شو لازم نعمل بعد اللي صار واللي بصير عند الدول العربية؟ كيف بدنا نتعامل في قضايانا الداخلية؟؟ ولا احنا ما النا دخل أو فكركم ما إلنا داخل؟!؟ احنا عنا احتلال...هل هاد بكفي مثلاً؟! [#/V#]كيف بدنا نتعامل مع بروز أنظمة وقيادات عربية جديدة؟ شو بدنا نعمل في قضايا الشباب الفلسطيني؟ شو بدنا نعمل يا جماعة نتفرج؟ ولا نشارك ولا نغير ولا نتغير ولا ندخل في الحيط ولا نعمل انتفاضة ثالثة ولا نبيع حكي للشعب ولا نعمل ورش عمل ومؤتمرات ونمتص الناس؟؟؟ ولا نحتضن الشباب ولا نحكي الله بقدر وبلطف ولا... ولا شو ولا انبوس الواوا ونسكت؟!.... يا عمي نعمل شي بس خلينا نعمل... لا الشعب عارف شو بدو ولا القيادة بتتعامل بالموضوع بجدية..... ممكن حدا يحكيلي ويفهمني شو نعمل؟!
إشرب قهوتك بلاش تبرد، ومحدش يفهمني غلط لأنو الموضوع حساس. هل القيادة بكل فئاتها ومؤسساتها المختلفة اجتمعت وطلعت بنتائج وتوصيات عملية بعد اللي صار واللي بصير في الوطن العربي؟ لوسمحت ... لوسمحت ما تحكيلي شو النا دخل؟ أي إذا زلزال اليابان أثر علينا! فما بالكم في مصر وتونس؟! ما بحكي نهز روسنا ونبصم بالعشرة انهم عملوا صح...لازم نفهم ونتعلم مش نبصم ونكرر من غير فهم! فاهمين علي؟!
بلا ما نحكي عن غيرنا يا مهداوي
حقك على راسي يا سيدي، بعرف... ما بدنا نقعد على خازوق الكويت
بس الشعب بسأل: شو لازم تعمل القيادة؟ فيه دروس اتعلمتها ولا ما في دروس، لأنه الشباب الفلسطيني بدو يركب القطار.... أنا بحكي لبعيد، بدو يركب قطار الأحزاب مثلاً اللي صار بدها 'فرمته' واعادة تشغيل من أول اذا بدها تشتغل صح وتستقطب دم جديد، وكمان أنا بحكي عن مؤسسات المجتمع المدني...اه الشباب لازم يمسك مواقع إدارية متقدمة، وخصوصاً مدراء المؤسسات اللي كانت بتحكي عن الشهيد ياسر عرفات خلص بكفي حكي...أنا بحكيلهم يا جماعة الشفافية، انتو توحدتوا مع مقاعدكم خلص روحوا.....روحوا واتركوا المؤسسه للدم الجديد. الدم الفايع...
المشكلة كبيرة وعويصة لأنه كل المؤسسات صار فيها تكلس وهرميه، عدوا على أصابعكم' الغرف التجارية، بعض النقابات، بعض الجامعات، بعض البلديات، مخاتير العيلة...عيلتنا فيها مخاتير مش مختار الله وكيلكم. بس الأهم انه لازم تستكمل عملية تراكم للأجيال عشان يصير في ثقافتنا جيل يخلف جيل.... شلال الثورة شلال...وشرارة تقدح حرية.
استنوا شوي، والله انكم شعب ما برحم، أي كلشي على القيادة.... كل مره القيادة القيادة، طب وين الناس اللي بتفهم ومتعلمة؟ وبتطلع تحلل على التلفزيون، سموهم 'الحكماء' هادا اذا بدكم، مش لازم هدول يجتمعوا ويعطوا تحليل علمي واضح وصريح، وبعدين يكون في توصيات عملية يرفعوها للمسؤولين، وهاي التوصيات تكون بجوانب مختلفة على سبيل المثال؛' الاعلام، الشباب، العلاقات الخارجية، كيف نتعامل مع اسرائيل في الوضع الراهن، منظمة التحرير الفلسطينية، صلحتنا مع غزة، الواقع الاقتصادي، ملفات الفساد،........... أقسم بالله عنا قضايا أكثر من الاتحاد السوفيتي بعز شبابه.
أنا مني وعلي يا جماعة بعد اللي شفته من ثورات، غيرت خططي وتكتيكي واستراتيجياتي، حطيت ابني ولي عهد، وزوجتي أعطيتها شوية حقوق، وصرت اجيب على البيت لحمة ودجاج بزيادة، وجيراني في العمارة نغنغتهم بأشياء خفيفة...لأنه وين أروح اذا انقلب الولد وإمه ضدي....أنام في الشارع.... ولا مرة.... اللي علي عملته... وراح أقاتل غرفة غرفة... مطبخ مطبخ... حمّام حمّام... درجة درجة... عتبه عتبه...أدّي إدّي (ع قولة خطاب ابني!)

تعليقات الفيسبوك
تعليقات الموقع